Околу 300 луѓе загинале во рускиот воздушен напад на театарот во Мариупол минатата недела, изјавија украинските власти. Театарот беше погоден на 16 март, иако покрај него со големи букви беше напишано „Деца“, со цел да биде видливо од воздух.

Во моментот на нападот, во театарот имало околу 600 цивили, главно жени и деца, од кои 300 биле во скривницата во подрумот. Властите во прв момент кажаа дека најголем дел од нив преживеале.

„Очевидците кажуваат дека околу 300 луѓе загинале во серијата напади на руските авиони на театарот“, објави градското собрание на Мариупол на Телеграм.

Русија негира дека го бомбардирала театарот.

Мариупол интензивно се гранатира од почетокот на руската инвазија на 24 февруари, што предизвика хуманитарна катастрофа во градот, а коридорите за евакуација на цивилите речиси да не функционираат.