Најдобрите школи за самба од Рио Де Жанеиро почнаа со парадите на славниот Карневал, првпат по двегодишна пауза поради пандемијата на ковид-19. Шарените платформи и раскошните танчери викендов се појавија на парада пред десетици илјади фанови на Самбадромот, кој изминативе две години служеше како прифатилиште за бездомници и вакцинален пункт.

Кетула Мело (38), муза на школото „Императриз Леополдиненсе“, облечена како богиња на афробразилските религии, е пресреќна што се враќа на Самбадромот.

„Овие две години беа ужасни. Сега можеме да бидеме среќни повторно“, кажа Мело.

Шарените платформи и раскошните танчери викендов се појавија на парада пред десетици илјади фанови на Самбадромот, кој изминативе две години служеше како прифатилиште за бездомници и вакцинален пункт. (Фото: Фејсбук/Рио Карневал)

Самбадромот во Рио е дом на парадата уште од 1980-те и е симбол на бразилските карневалски активности.

Првиот случај на ковид-19 во Бразил беше потврден во средината на март 2020 година, само што заврши Карневалот таа година. Минатата година беше одложен поради појавата на Делта сојот, а годинава беше одложен поради Омикрон сојот.
Повеќе од 663 илјади Бразилци починаа од ковид-19, што е втора највисока бројка во светот, по САД.