55-годишен жител на Мешеишта од Општина Дебрца е осомничен за загрозување на сигурноста на британската амбасадорка во Скопје, соопшти Основното јавно обвинителство Скопје.

Тој на 14 април се јавил на официјалниот телефонски број на амбасадата, каде се вклучил автоматскиот оператор на централата и на говорниот апарат оставил порака со заканувачка содржина: „Британската амбасадорка во Скопје ќе биде нападната со огнено оружје. Ова не го пријавувам во македонската полиција, затоа што нема да ја сфатат сериозно заканата“.

По ова, повикот го прекинал, но пораката била сочувана во системот. Од обвинителството велат дека со ова осомничениот ја загрозил сигурноста на британската амбасадорка во Скопје.

Бидејќи постојат околности кои укажуваат на опасност осомничениот да избега, пред сè ако се има предвид видот и карактерот на стореното кривично дело и последиците од него, надлежниот јавен обвинител до судијата на претходна постапка од Основниот кривичен суд во Скопје достави предлог за определување мерка притвор.​​