Милиони жени низ САД наскоро би можеле да го изгубат законското право на абортус, стои во документ од Врховниот суд, што протече во јавност. Во него се вели дека највисокиот суд во земјата гласал за поништување на пресудата од случајот Роу против Вејд од 1973 година, со која аборусот беше легализиран на национално ниво.

Ако ова биде потврдено, абортусот би можел да биде забранет во 22 американски сојузни држави. Се очекува одлуката на судиите да биде објавена на крајот на јуни или во почетокот на јули.

Протечениот документ насловен „Прв нацрт“ наводно го одразувал мнозинското мислење на судиите и сајтот „Политико“ објави дека тој бил напишан од судијата Семјуел Алито. Засега е непознато дали ова е конечното мислење, зашто и во минатото се случувало судиите да се премислат. Белата куќа и Врховниот суд засега не излегоа со коментар, но протекувањето на оваа информација доведе до протести во Вашингтон.

Водечките демократски политичари Ненси Пелоси и Чак Шумер кажаа дека ако извештајот е точен, Врховниот суд ќе го воведе најголемото ограничување на правата во последните 50 години.

Пресудата од случајот Роу против Вејд повторно се разгледуваше на барање на Мисисипи, кое бара нејзино поништување.