Пекара со европски колачи е реткост во Сингапур, а уште поретки се пекари како „Југославија“ , именувана по земја што веќе не постои. Отворена од македонската двојка Митре и Катерина Крајовски, пекарата нуди традиционална храна од овие простори на локалците во Сингапур.

Крајовски првин отворија кафуле, а потоа се проширија со пекара во април годинава.

„Ова не е обична комерцијална пекара. Правиме домашните рецепти за кои е потребно подолго време да се подготват, но така се подобри. Правиме слатки кои обично се прават кога има некоја прослава“, вели 53-годишниот Митре.

Јадењата кои ги прават Митре и Катерина често се прават за посебни прилики во македонските домови, како имендени. Тој на Сингапурците им објаснува што е христијанската традиција именден и како се слави.

„Каниме пријатели и роднини, може да ви дојдат 30 до 50 луѓе и трае цел ден“, вели Митре.

Тој работи како пилот за Сингапур Ерлајнс и лета авион Боинг 777.  Во Сингапур е преселен пред 17 години. Катерина е економист, но не сакала да работи во канцеларија, па отвориле пекара. Митре ѝ помага на Катерина во кафулето и пекарата секогаш кога не лета.

Најпопуларни јадења во нивната пекара се бурек со јогурт, кифлички, погача, Васина торта, бајадера, баклава и орасници.