Бараж руски ракети го погодија главниот град на Украина рано изутринава, погодувајќи неодредени цели во инфраструктурата, изјави градоначалникот на Киев. Нема информации за загинати, а едно лице е хоспитализирано со повреди.

Но, нападот го уништи чувството на смиреност во Киев, кој нема видено слични напади од посетата на генералниот секретар на ОН, Антонио Гутереш на 28 април. И тоа покажа дека Русија сè уште има способност и подготвеност да го гаѓа главниот град на Украина, откако ја запре пошироката офанзива низ целата земја, за да се фокусира на исток.

Ракетите ги погодија областите Дарњицки и Днипровски во Киев, а службите за итни случаи пристигнаа на местото на настанот, изјави градоначалникот Виталиј Кличко на апликацијата за пораки Телеграм. Сирените за воздушен напад се вклучија околу времето на експлозиите.

Руските сили продолжуваат со напорите да заземат територија во источна Украина, со ракетни и воздушни напади извршени врз градови и села во регионот Луганск. Денеска, Генералштабот на Украина ги обвини руските сили за употреба на фосфорна муниција во регионот Харкив и рече дека Москва продолжува да изведува ракетни и воздушни напади врз воената и цивилната инфраструктура, вклучително и во Киев. Генералштабот соопшти дека руските војници користеле муниција со фосфор во областа на селото Черкаски Тишки во регионот Харкив.