Бугарскиот претседател Румен Радев смета дека францускиот предлог за одблокирање на македонските евроинтеграции е најдобар и најфер во моментов. Тој е задоволен што бугарските барања се влезени во предложената преговарачка рамка за Македонија.

„Билатералните прашања мора да се издигнат на ниво на ЕУ, во преговарачката рамка. Ова не е просто билатерален спор за историја, ова се прашања кои што се косат со фундаментите на ЕУ и по многу средби и убедувања, најпосле европските партнери сфатија дека таму е местото за решавање на тие прашања“, изјави Радев денеска на форум во Рига, Летонија.

Бугарскиот претседател сепак вели дека во моментов нема доволно време за да се крене ветото до крајот на неделава, кога ќе се одржи средбата на лидерите на земјите членки на ЕУ во Брисел.