Скринингот на ЕУ ќе започне на 15 септември и ќе трае до крајот на 2023 година, а обуката на нашата администрација ќе почне по летните одмори, изјави денеска вицепремиерот за европски прашања Бојан Маричиќ. Тој вели дека е во тек интензивна комуникација со Брисел и се прават забрзани подготовки и во тренинг центарот на СЕП.

„Планираме заедно со претставниците во Брисел по летните одмори веднаш да започнеме со обука на нашата администрација и на оние кои ќе учествуваат во првиот кластер – темелни вредности, да започнеме и со објаснување на методологијата и со објаснување на процесот на скрининг. Тоа ќе биде тековна работа на Тренинг центарот се до завршување на преговорите“, рече Маричиќ на денешната прес-конференција во Владата.

Маричиќ очекува да станеме полноправна членка на ЕУ во првата наредна рунда на проширување, кога и тоа да се случи.

„Евроинтеграцијата не зависи само од нас и не е добро да се лицитира со датуми, затоа што не можеме да предвидиме точно кога ќе се случи. Нам ни е цел првото наредно проширување, кога и да се случи, Северна Македонија да биде дел од тоа проширување и тоа е достижно ако работиме интензивно на имплементација на стандардите на ЕУ и доколку ги водиме преговорите како што треба со ангажман на институциите и целото општество“, вели Маричиќ.

Понатаму, тој вели дека Северна Македонија, според извештаите на Европската комисија, стои подобро или еднакво добро во најголем дел од кластерите со државите кои веќе преговараат 10 години.

„Тоа значи дека ние не сме го изгубиле времето во чекална и дека сме работеле интензивно на усогласување и на прописите и на праксата, на нивно имплементирање. Секако дека имаме многу работа, далеку од тоа дека работата е завршена но треба да си поставиме амбициозни цели за да можеме да исполниме во некој реален рок. Гледано, најоптимистички оваа рамка за претпристапна помош завршува 2027 година и ние треба да работиме и да се бориме наредната претпристапна рамка да важи за што помалку држави, односно да бидеме држава членка, вели Маричиќ.