Изложбата „Ретро: телесни ретроспективи“ на уметницата Јана Јакимовскa ќе се отвори утре во 20 часот во Музејот на современата уметност во Скопје. Изложбата има мултимедијален карактер и опфаќа дела од повеќе периоди од нејзиното творештво.

Ова е 21. самостојна изложба на Јакимовска и ќе биде отворена до 5 октомври.

„Во фокусот на изложбата е телото, но како метафора за човечкото, профаното, нелагодното: телото старее, се дебелее, копулира, раѓа, крвави. Каде е границата меѓу мене и моето тело? Што е јас, а што телото? ‘Ретро’ не претендира да биде ретроспективна изложба, бидејќи не е. Таа само рециклира и реконтекстуализира некои веќе видени концепти, во обид да одговори на овие прашања“, вели Јакимовска во најавата на изложбата

Јана Јакимовска е родена во 1981 во Скопје. Дипломирала и магистрирала на Факултетот за ликовни уметности во Скопје. Имала самостојни изложби во Берлин, Њујорк, Белград, Приштина, Скопје, Гевгелија, Куманово и Штип и учествувала на преку 80 други изложби. Вонреден професор е на Ликовната академија во Штип.