Турција извести дека втор силен земјотрес за помалку од 12 часа го погоди југоисточниот дел на земјата, а државните медиуми во Сирија објавија дека се почувствувал и во главниот град Дамаск. Според Американскиот геолошки институт, тој имал јачина од 7,5 степени според Рихтерова скала, а епицентарот бил кај градот Караманмараш, на длабочина од два километра.

Бројот на загинати во денешниот катастрофален земјотрес во Турција и Сирија надмина илјада и се стравува дека тој ќе биде многукратно поголем. Турскиот претседател Реџеп Таип Ердоган кажа дека само во Турција има најмалку 912 загинати и 5.383 повредени, при што најмногу смртни случаи, 80, има во Газијантеп, сместен 90-ина километри од границата со Сирија.

Сириските власти кажаа дека во земјата има над 320 мртви и повеќе од 1.000 повредени.

„Во Турција се разурнати околу 3.000 згради. Бидејќи расчистувањето на остатоците продолжува, не знаеме до каде ќе расте бројот на мртви и повредени“, изјави Ердоган, додавајќи дека околу 45 држави од цел свет веќе понудиле и почнале да испраќаат помош, меѓу кои и САД, Русија и Украина.

Со јачина од 7,8 степени според Рихтерова скала, ова е најсилниот земјотрес во Турција во последните 84 години. Земјотресот од 7,6 степени во Измир во 1999 однесе над 17.000 животи.

Епицентар бил близу градот Газијантеп на длабочина од 17,9 километри. Тој се случил во 4:17 часот по локално време (2:17 часот по македонско), бил почувствуван и во Либан, Кипар и Израел, а потоа имало уште два со јачина од 6,4 и 6,5 степени.