Француските власти ќе бидат „бескомпромисни“ во спроведувањето на новата забрана за носење муслиманска наметка абаја во училиштата, изјави францускиот претседател Емануел Макрон, по одлуката да се забрани оваа облека во претстојната академска година. Забраната, која ја објави францускиот министер за образование, е најнова во серијата спорни ограничувања за облеката поврзана со муслиманите. Одлуката беше критикувана од голем број опозициски пратеници, меѓу кои и Даниел Обоно, која ја нарече „нова исламофобна кампања“.
Во изјава по посетата на училиште во регионот Воклуз во јужна Франција, вчера Макрон повтори дека „религиозните симболи од кој било вид немаат место“ во француските училишта според принципот на „секуларизам“ на земјата.
„Училиштата во нашата земја се секуларни, бесплатни и задолжителни. Но, тие се секуларни. Затоа што тоа е самиот услов што го прави возможно државјанството и затоа верските симболи од секаков вид немаат место во нив. И ние енергично ќе го браниме овој секуларизам“, рече Макрон.
Наставниците и раководителите на француските училишта „нема да бидат оставени сами“ кога станува збор за спроведување на забраната, рече Макрон, додавајќи дека француските власти ќе бидат „бескомпромисни по оваа тема“.
„И во средните училишта или колеџи кои се најчувствителни, ќе биде испратен специфичен кадар заедно со раководителите на институциите и наставниците за да ги поддржат и да се вклучат во неопходен дијалог со семејствата и учениците. Но, нема да дозволиме ништо да помине“, додаде тој.
Франција во последниве години спроведува низа контроверзни забрани и ограничувања за вообичаените исламски облеки, кои често предизвикуваат гнев кај муслиманските земји и меѓународните агенции. Минатата година пратениците ја поддржаа забраната за носење хиџаб и други „впечатливи верски симболи“ на спортски натпревари. Амандманот беше предложен од десничарската партија Републиканци, која тврди дека хиџабот може да ја загрози безбедноста на спортистите кои го носат додека спортуваат. Претходната забрана на Франција за никаб – превези на целото лице што ги носат некои муслиманки – ги прекрши човековите права на оние што го носеа, соопшти Комитетот за човекови права на Обединетите нации во 2018 година.
