Седумдесетина илјади присутни на фестивалот Брнинг мен во американската сојузна држава Невада вчера заглавија во кал – многумина боси или со пластични кеси на нозете – поради поплавите од бурите што ја зафатија пустината Невада, што ги принуди организаторите да го затворат пристапот со возила. Покрената е истрага за смртта на едно лице при поројниот дожд, но засега нема детали како загинало.Учесниците беа повикани да се засолнат и да зачуваат храна, вода и други резерви. Портите за возилата ќе бидат затворени до крајот на настанот, кој започна на 27 август и требаше да заврши утре.

Не се знае дали и кога влезот повторно ќе биде отворен, а и кога учесниците би можеле да го напуштат теренот. (Фото: АП)

Голем дожд падна во петокот на местото на фестивалот, кое се наоѓа на 177 километри северно од Рено, а врнежи се очекуваат и денеска. Организаторите почнаа да ја ограничуваат продажбата на мраз и целиот сообраќај на возила на пространите терени на фестивалот е запрен, поради што преносливите тоалети не може да се сервисираат. Не се знае дали и кога влезот повторно ќе биде отворен, а и кога учесниците би можеле да го напуштат теренот.

Искусните учесници кои доаѓаат две децении велат дека ќе треба најмалку 3 дена за да се исуши теренот по врнежите. Најавите дојдоа непосредно пред кулминацијата на фестивалот – кога синоќа требаше да се запали големата скулптура од дрво. Фестивалот е именуван по палењето на големата дрвена структура наречена Човекот на претпоследната ноќ.