По повод празникот 11 Октомври, Ден на востанието на Македонија против фашизмот, 1.200 ученици од основните и средните училишта, облечени во црвена и жолта боја, го формираа македонското знаме на плоштадот „Методија Андонов-Ченто“ во Прилеп. Знамето беше со димензии 24 на 12 метри. Со ова се возобнови една стара и убава традиција во Прилеп, од каде на 11 октомври 1941 заедно со Куманово почна вооружениот отпор против фашистичкиот окупатор.

„Овој чин нас нè прави горди и говори за љубовта кон татковината и почитта кон нејзините историски вредности, кои се втемелени во сите сегменти од нашиот град и држава, за слобода и демократија на македонскиот народ, како и за создавањето и градењето на почит кон татковината од најмлада возраст, како клучен фактор за развивање на чуството кај младите луѓе да си ја сакаат, почитуваат, штитат и чуваат татковина, и да ги почитуваат сите нејзини национални белези и симболи“, рече градоначалникот Борче Јовчески.

Годинава се навршуваат 82 години откако во Прилеп и Куманово со нападите на бугарските полициски станици започна борбата за ослободување на Македонија од фашистичкиот окупатор.

Ж. ЗДРАВКОВСКА