Советник на шефот на украинската војска Валери Залужни загинал откако експлодирала граната која била меѓу роденденските подароци, изјавија официјални лица.

„Мојот асистент и близок пријател, мајорот Генади Частјаков, загина во трагични околности на својот роденден“, напиша Залужни на Телеграм, додавајќи дека била детонирана непозната експлозивна направа меѓу подароците.

Смртта на Частјаков првично беше претставена како атентат, но министерот за внатрешни работи Игор Клименко кажа дека тој на својот син му покажувал кутија со гранати што ја добил како подарок.

„Тој зел една граната од рацете на син му, при што ја повлекол иглата и дошло до трагична експлозија. Полицијата го идентификуваше војникот кој му го дал подарокот“, изјави Клименко.

Полицијата кажа дека 13-годишниот син на Частјаков е сериозно повреден, додека неговата сопруга изјави дека гранатата била во кутија што тој ја донесол дома.