(Специјално од Берлин: Марина КОСТОВА)

„Анатомија на падот“ на француската режисерка Жистин Трие е апсолутниот победник на 36. Европски филмски награди, освои 4 статуетки и тоа за најдобар филм, за режија, за сценарио и за најдобра актерка за Сандра Хилер.

На гала церемонијата во Берлин, филмот на Трие победи во сите 4 категории во кои беше номиниран, а најголемото изненадување е што без награда останаа двата фаворити со по пет номинации, пред сѐ „Зоната на интерес“ на Џонатан Глејзер и „Паднатите лисја“ на Аки Каурисмаки. Наградата за најдобар актер ја доби Мадс Микелсен за „Ветена земја“.

„Сега се плашам пак да режирам”, се пошегува Трие на прес-конференцијата по завршувањето на церемонијата, што ја следеа над 1.000 гости во берлинската Арена.

Таа рече дека филмот, судска драма во која писателка е обвинета дека го убила сопругот, кој победи во Кан, е плод на мачна работа, го напишале заедно со сопругот Артур Харари во времето на ковид изолацијата низ бројни преиспитувања на брачните односи и дека е изненадена колку многу луѓе низ светот ѝ кажале дека ги допира приказната.

Филмот е и хит во кината низ Франција, но не е и француски кандидат за Оскар, што беше скандал, но Трие рече дека тоа не ѝ е важно оти делото си има свој живот и веќе не ѝ припаѓа.

Сите наградени на синоќешното доделување на Европските филмски награди. (Фото: ЕФА)

Сандра Хилер, која беше номинирана за најдобра актерка и во „Анатомија на падот“ и во „Зоната на интерес“, примајќи ја наградата на сцена ги замоли присутните за миг да замолчат и да се обидат да замислат свет во мир.

„Уметноста не постои во вакуум и не е независна од светот во кој живееме, а светот денес не е во мир”, рече Хилер на прес-конференцијата по завршувањето на галата.

Највозбудена на доделувањето беше Естонката Ана Хинтс, која победи за најдобар документарец за „Сестринство на парната сауна“ и која на сцена се заблагодари со песна.

„Го работевме филмот седум години и целта ни беше сауната да ја видиме не само како надворешно, ами и внатрешно прочистување. Женското тело е толку подложено на објективизација што сакавме на некој начин да си го вратиме, да ѝ припаѓа само на жената”, рече таа на прес-конференцијата.

Естонката Ана Хинтс доби награда за најдобар документарец за „Сестринство на парната сауна“. (Фото: СДК.МК)

Шпанскиот „Сништа на роботот“ на Пабло Бергер освои награда за најдобар анимиран филм, а режисерот на сцена извика „Анимацијата не е жанр!“.

„Анимираниот филм е за сите, и за деца и за млади и за возрасни и одбивам да му ја одземам важноста“, рече тој на прес-конференцијата.

Многумина од критичарите и новинарите присутни на доделувањето сметаат дека Глејзер, чиј филм е за наци командант во Аушвиц кој со семејството живее во самосоздадена рајска градина на работ на логорот, е неправедно оштетен од дистрибутерот, кој не им оставил доволно време на членовите на Европската филмска академија да го гледаат за да може и да гласаат за него.

Иако Глејзер и целиот тим беа во Берлин, сепак дистрибутерот не им дозволи ниту да даваат интервјуа, ниту да се експонираат во медиумите, со оглед дека претстои американската премиера и целта е номинација за Оскар.

Наградата на Меѓународното здружение на филмската критика ФИПРЕСЦИ за откритие на годината ја доби „Како да се има секс“ на Моли Манинг Вокер.

Моли Манинг Вокер е наградена од Меѓународното здружение на филмската критика ФИПРЕСЦИ за откритие на годината. (Фото: СДК.МК)

Со долг стоечки аплауз беше дочекан и почесниот лауреат, славниот унгарски режисер Бела Тар, како и Ванеса Редгрејв, на која во видеопорака наградата за животно дело во нејзинот дом ѝ ја врачи ќерка ѝ, актерката Џојли Ричардсон.

Македонската актерска легенда Мето Јовановски, кој почина минатиот месец, беше меѓу заминатите великани на европскиот филм, на кои им се оддаде почит на сцената.