Производителот на луксузен накит и часовници „Шопар“ тивко отвори „антихотел“ во срцето на Париз. Многу работи за првиот хотелски проект на брендот – почнувајќи од неговото име, „1 Плас Вендом“, и необичниот недостаток на помпа и самопромоција – на почетокот изгледаат нетипични.
Самиот хотел, кој ги зафаќа катовите над постоечкиот бутик на „Шопар“ на прекрасниот плоштад Плас Вендом, лесно може да се пропушти поради очигледниот недостаток на брендирани знаци за да се најави неговото присуство. Тоа е вид на дискреција што е во согласност со еден од најаспиративните животни стилови на денешницата: тивок луксуз. Но, тој исто така го отелотворува еден од поголемите маркетинг трендови во светот на луксузот, скришна промоција.
На вториот кат е еден од најзначајните бисери на хотелот, „Зимска градина“. (Фото: Си-Ен-Ен)
„Живееме во време во кое, кога ги лансирате вашите производи тоа се прави со голема маркетинг кампања и голем настан. Сето тоа е церемонијално. Сакавме да ги правиме работите поинаку… Со многу попрецизна цел“, вели Карл-Фриц Шојфеле, кој е третата генерација на семејството Шојфеле – сопственици на „Шопар“ од 1963 – и портпарол на хотелот.
Тоа значеше директно поврзување со туристички агенции за луксузен туризам, селективно користење на нивните ПР канали и отворање на хотелот само за гостите кои престојуваат во него и за клиентите на ВИП „Шопар“ (што значи дека не може да се влезе само за пијачка во барот).
Собата Компас – редовните соби чинат од 1.400 евра за ноќевање. (Фото: Си-Ен-Ен)
„Постои растечка клиентела која бара ексклузивност и приватност. Сакавме да создадеме полуприватен хотел, како навистина убава семејна резиденција“, вели проектниот советник Дидие Ле Калвез, ветеран за угостителство чие портфолио вклучува луксузни хотели.
Тоа е искуство кое би било познато, можеби дури и утешно, за ултрабогатите во светот. Откако ќе поминат низ главните сини врати и ќе ја отворат вратата од ковано железо, дискретно украсена со курзивното „Ц“ за „Шопар“ (Chopard), гостите влегуваат во фоаје со висок таван и ги пречекува хотелскиот батлер. Нема рецепција, ниту гости кои чекаат во редот за пријавување или заминување. Само монументално камено огниште од 18 век, грандиозни скалила и, во суптилен знак на наследството на хотелот, џиновска инсталација на ѓердан од стаклена мониста од Мурано стакло во аквамарин боја на уметникот Жан-Мишел Отониел.
Наместо тоа, пријавувањето се врши на мало биро на вториот кат, каде што заедничките простории се поставени како во луксузна куќа: салон, библиотека, бар и таен салон за пури инспириран од Кина, скриен зад ѕид од лажни полици за книги.
Откако ќе поминат низ главните сини врати и ќе ја отворат вратата од ковано железо, гостите влегуваат во фоаје со висок таван и ги пречекува хотелскиот батлер. (Фото: Си-Ен-Ен)
Исто така, на истиот кат се наоѓа и еден од најзначајните бисери на хотелот, „Зимска градина“, дневна соба со стаклен покрив облеана во природна светлина, поставена наспроти мозаичниот мурал што оддава почит на колекцијата накит на „Шопар“ инспирирана од животинскиот свет. Со илјадници полирани скапоцени камења – наречени кабохони – мозикот прикажува егзотична сцена од џунглата со пауни, леопарди, мајмуни и пеперутки.
Наместо да го именува хотелот по брендот, семејството ја избрало адресата на зградата, 1 Плас Вендом, што му овозможува на хотелот да стои сам, ослободен од асоцијациите што доаѓаат со луксузната куќа за накит. Реконструкцијата на зградата од дизајнерот Пјер-Ив Рошон траеше четири години. Ѕидовите беа срушени, таваните подигнати и бројот на соби преполовен (претходниот станар на зградата исто така беше хотел) за да се создадат 10 апартмани и пет соби. Според визијата на копретседателот на „Шопар“ и уметнички директор Каролин Шојфеле, апартманот Париба (именуван по ѓерданот од турмалин на куќата) има рачно извезени ѕидни облоги инспирирани од тропски стил. Шинозеријата во собата Жад e вклучува евокативни лакирани предмети, црн, црвен и златен мебел, заедно со азиски решеткасти резби инспирирани од антиката.
Но, Апартманот Шопар на вториот кат го носи луксузот уште еден чекор понатаму. Позлатениот апартман блеска со кристални лустери закачени на таван од 17 метри, мермерен камин и обемна настрешница над креветот што потсетува на Версај. Цените се од 14.000 евра за ноќевање. Редовните соби се од 1.400 евра.
Додека Париз има неколку дворци од 17 и 19 век кои се претворени во бутик хотели, Ле Калвез вели дека „1 Плас Вендом“ го подига нивото.
„Го позиционираме како антихотел“, вели Шојфеле. „Ние нема да бидеме избор број еден за посетителите кои првпат се во Париз, има многу прекрасни хотели за да ја пополнат таа понуда. Мислам дека повеќе сме за некој кој веќе видел голем дел од можностите за престој во Париз и бара нова перспектива“, вели тој.
