Од 1 до 7 јануари се пријавени 1.025 случаи на заболени од грип или заболувања слични на грип, a во споредба со бројот за првата недела од типичната епидемиска крива од последните 13 сезони, бројот е зголемен за 68.8 отсто, стои во извештајот на Институтот за јавно здравје (ИЈЗ). Бројката на заболени за наведениот период е за 2.5 пати повеќе во споредба со претходната недела. Бројот на пријавени лица оваа недела, споредено со прва недела од минатата сезона, е зголемен за 24,8 проценти.
„Пријавената инциденца за првпат оваа сезона е над неделната граница на сезонската активност на вирусот на грип, односно достигнат е прагот на влез во сезоната на грип“, велат од ИЈЗ.
Во однос на возрасната дистрибуција, 544 лица се на возраст од 15-64 години, 233 кај деца на возраст од 5-14 години, 185 кај деца на возраст од 0-4 години и 63 се регистрирани кај лица на возраст над 65 години. Највисока инциденца се регистрира кај децата на возраст од 0-4 години. Најмногу од пријавените се од Скопје, Дебар, Гостивар, Штип и од Битола.
„Во текот на оваа недела, регистрирани се два смртни случаја асоцирани со грип. Се работи за лица на возраст од 56 и 61 години од Скопје и Куманово, кои биле хоспитализирано во Клиниката за пулмологија и алергологија. Кај починатите лица е утврдено присуство на коморбидитети – кардиоваскуларни и белодробни и не биле вакцинирани со вакцина против сезонски грип. Кај починатите лица, лабораториски е потврдена Инфлуенца А(Х1)пдм09“, велат од ИЈЗ.
Од Институтот потсетуваат дека вакцинацијата против сезонски грип е најефикасна заштита од ова заболување и препорачуваат вакцинација на целото население, особено напостарите лица – над 65 години, деца на возраст од 6-59 месеци, лица постари од шест месеци со хронични болести, бремени жени, како и здравствени работници.
„За сезоната 2023/2024, Министерството за здравство обезбеди бесплатна четиривалентна вакцина во вкупна количина од 60.000 дози, наменета за приоритетни групи население. Дополнителни 15.000 дози на четиривалентна вакцина се обезбедени преку донација од ПИВИ . Заклучно со првата недела од оваа година во Македонија, вакцинирани се вкупно 60.766 лица со бесплатна или комерцијална вакцина“, стои во извештајот на ИЈЗ.
