Канадски турист е уапсен откако отворил врата на авион на „Таи ервејс“ кој се подготвувал да полета од аеродромот во тајландскиот град Чијанг Маи.

„Целиот авион беше во хаос. Што ако бевме на надморска височина од девет километри?“, напиша на Фејсбук една патничка во авионот.

Патникот ја отворил вратата за итни случаи, поради што се активирала лизгалка на надувување и авионот бил оневозможен да полета, кажа директорот на аеродромот. Авионот се вратил во терминалот и патниците излегле од него. Инцидентот влијаел врз десетина други летови на аеродромот.

„По техничката инспекција, авионот доби дозвола за полетување“, кажаа од аеродромот.

Патникот бил приведен, а во полиција бил идентификуван како турист од Канада.

„Тој призна дека ја отворил вратата зашто мислел дека некои луѓе го бркаат. Веројатно халуцинирал“, изјави адвокатот на патникот.