Претставничкиот дом на САД одобри нацрт-закон со кој би се забранила платформата ТикТок ако нејзината матична компанија со седиште во Пекинг не се откаже од популарната платформа за социјални медиуми. Нацрт-законот за ТикТок, што беше вклучен во пакетот нацрт-закони со кои ќе се испрати помош за Украина и Израел, може да стане закон веќе следната недела, ако брзо се усвои во Сенатот.
Во март, Претставничкиот дом усвои закон со кој се бара од „БајтДанс“, сопственик на ТикТок, да ја продаде платформата во рок од шест месеци, или ќе се соочи со забрана во САД. Но, некои сенатори, меѓу кои и претседателката на Комитетот за трговија на Сенатот, демократката Марија Кантвел, изразија загриженост дека рокот од шест месеци ќе биде прекраток за да се спроведе сложена зделка што може да вреди десетици милијарди долари. По преговорите со Сенатот за ова прашање, Претставничкиот дом вклучи изменета верзија на законот во пакетот за помош на Украина и Израел.
Ревидираната легислатива ќе му даде на „БајтДанс“ девет месеци да го продаде ТикТок и можно тримесечно продолжување ако продажбата е во тек. Нацрт-законот ќе ѝ забрани на компанијата да го контролира тајното оружје на ТикТок: алгоритмот што ги храни видеата на корисниците врз основа на нивните интереси.
Пратениците од двете страни – како и службениците за спроведување на законот и разузнавањето – долго време изразуваат загриженост дека кинеските власти би можеле да го принудат „БајтДанс“ да предаде податоци за 170 милиони Американци кои користат ТикТок. Загриженоста потекнува од група кинески закони за национална безбедност кои ги принудуваат организациите да помагаат во собирањето разузнавачки информации – на кои најверојатно би бил предмет и „БајтДанс“ – и други далекусежни начини на кои авторитарната влада на земјата врши контрола.
Приложувањето на нацрт-законот за ТикТок кон пакетот помош за Украина и Израел се очекува да ги забрза напорите за усвојување на регулаторната мерка, која има широка двопартиска поддршка во Сенатот.
Претседателот Џо Бајден рече дека ќе го потпише законот за ТикТок ако дојде на неговото биро. Ако тоа се случи, се очекува да биде оспорен од ТикТок, кој тужеше за да се спротивстави на претходните обиди за забрана на платформата и на национално и на државно ниво.
