Телото на жена е извлечено од потопен автомобил во Баварија, со што бројот на жртвите на големите поплави во јужна Германија порасна на пет. Останатите загинати се пронајдени вчера и во неделата, од кои тројца во поплавени подруми.

Постојаните поројни дождови предизвикаа излевање на реки и големи поплави викендов. Иако ситуацијата се смирува во југозападна Германија, нивото на водата останува високо во делови од Баварија, особено на Дунав и во југоисточната област Розенхајм. Некои железнички линии, меѓу кои и неколку кон Минхен, и натаму се во прекин.

Полицијата кажа дека петтата жртва е пронајдена во гратчето Маркт Ретенбах, и тоа во возило кое излетало од патот, по што било потопено.

Канцеларот Олаф Шолц вчера го посети погодениот регион и предупреди дека земјата мора подобро да се подготви за природните катастрофи предизвикани од климатските промени.

„Повеќе од 3.000 луѓе се евакуирани поради поплавите и овој број би можел да расте. Ситуацијата останува сериозна“, изјави премиерот на Баварија, Маркус Зедер.