Во Општините Теарце, Врапчиште и Јегуновце и во селата кои гравитираат кон овие општини, поставени се над 1.400 смарт улични лед светилки. Тие се поставени преку проектот „Одржлив и инклузивен рамномерен регионален развој“, кој го реализираше Министерството за локална самоуправа со поддршка на Владата на Швајцарија, а чија цел е инфраструктурна поддршка насочена кон подобрување на осветлувањето во општините.

Со поставувањето на новото улично осветлување во овие општини не само што е подобрена безбедноста на населението во вечерните часови, туку и се намалени трошоците за струја.

„Од досега поставените вакви светилки веќе имаме намалување на трошоците за електрична енергија за осветлување на улиците од 12 проценти. Кога ќе ги замениме светилките во сите населени места во Општина Теарце очекуваме заштедата на електрична енергија да биде над 30 проценти, а вакви заштеди се очекува да има и во другите две општини каде е инсталирано вакво улично осветлување“, изјави Нухи Незири, градоначалник на Општина Теарце.

Донатор на овие над 1400 улични светилки е Владата на Швајцарија, а проектот се реализираше преку Министерството за локална самоуправа.

„Со овој проект направена е замена на најголемиот дел од уличното светло со што се заштедува енергија, се намалуваат трошоците, се создава и поголема безбедност на граѓаните, а исто така, со овие светилки, се придонесува за заштита на животната средина со тоа што се намалуваат емисиите на јаглерод. Со овие три Општини имаме одлична соработка, како и со Центарот за плански регионален развој и со Министерството за локална самоуправа, а ова е многу добар модел кој би можеле да го реплицираат и другите општини“, изјави Вероник Улман, амбасадорка на Швајцарија во Македонија.

З. АНДОНОВ