Денешното убиство на еден од најважните руски генерали Игор Кирилов во Москва покажа дека Украина ги засилува атентатите на руска територија. Ова е трето вакво убиство што украинската тајна служба го извршила во изминатиот период.

На 13 ноември мета беше високиот руски поморски офицер Валери Тренковски, кој беше ликвидиран со автомобил-бомба на Крим. Извор од Украинската безбедносна служба (СБУ) тогаш кажа дека Тренковски бил воен злосторник кој наредувал ракетни напади врз цивилни цели во Украина.

Се верува дека украинското разузнавање стои и зад убиството на Михаил Шацки на 12 декември близу Москва. Шацки беше научник вклучен во руската програма за развој на проектили и софтвер со вештачка интелигенција за дронови.

Генерал-полковникот Кирилов беше шеф на руските нуклеарни, биолошки и хемиски одбранбени сили од април 2017 и неговото убиство се случи само ден откако СБУ го обвини дека е одговорен за масовна употреба на забранетото хемиско оружје во Украина. Рускиот истражен комитет кажа дека Кирилов го напуштал својот стан кога била детонирана направа скриена во скутер. Во експлозијата, која се случи само седум километри од Кремљ, загина и негов помошник.

Украинските медиуми објавија дека зад нападот стои СБУ, повикувајќи се на неименуван извор од службата.

„Кирилов беше легитимна мета зашто извршил воени злосторства“, кажа изворот од СБУ.