Шест лица загинаа кога боца со пропан-бутан експлодираше во ресторан во северозападниот чешки град Мост, при што беше запалена зградата, соопштија во неделата службите за итни случаи. Осум лица се повредени во огнената експлозија што се случи доцна синоќа, а 30 лица се евакуирани од ресторанот и околните згради, соопшти чешката противпожарна служба за спасување на платформата X.

„Според првичните информации од очевидци, греалка се превртела, предизвикувајќи пожар“, соопштија од противпожарната единица. Министерот за внатрешни работи Вит Ракусан изјави за Чешкото радио дека причината најверојатно е грејач со пропан-бутан кој се превртел во предната градина на ресторанот.

Порталот „Блеск.цз“ објави изјава од очевидци дека несреќата е последица на пијана кавга.

„Двајца момци се скараа и почнаа да се тепаат. За време на тепачката, едниот од нив ја турнал греалката, поради што се запалила дрвената опрема“, изјавил сведок за „Блеск.цз“.

Пламенот брзо се проширил од греалката низ целото место, а огромната топлина потоа предизвикала серија експлозии. Очевидците велат дека зад сè стоел алкохолот во крвта на еден од гостите, кој збеснал откако персоналот одбил да му послужи пијалок.

Противпожарната бригада соопшти дека спасила еден тешко повреден гостин во ресторанот кој бил заробен во бањата. Во моментот на експлозијата во ресторанот имало околу 20 гости, јави Чешкото радио.