Ако Доналд Трамп ја повлече американската помош за Украина, Европа сама нема да може да ја пополни празнината, предупреди Володимир Зеленски во интервју за весникот „Гардијан“.

„Некои велат дека Европа би можела да понуди безбедносни гаранции за Украина без Америка, но јас секогаш велам не. Безбедносни гаранции без Америка не се вистински гаранции“, кажа Зеленски.

Трамп тврди дека брзо може да ја заврши војната, но постојат стравувања дека договорот што ќе го понудат САД би можел да ја принуди Украина да капитулира пред големите барања на Владимир Путин. Зеленски вели дека е спремен да преговара, но само ако Украина има силна позиција.

Зеленски оваа недела ќе се сретне со американскиот потпретседател Џеј Ди Венс на Минхенската безбедносна конференција. Венс лани одби да се сретне со Зеленски и кажа дека му е гајле што се случува во Украина.

Зеленски кажа дека би им понудил на американските компании богати договори за обнова на Украина и можност за инвестиции, додека Трамп пројави интерес за украинските резерви на ретки минерали.

„Украина ги има најголемите резерви на ураниум и титаниум во Европа и не е во интерес на САД тие резерви да паднат во рацете на Русија, Северна Кореја, Кина или Иран“, кажа Зеленски.

Тој смета дека е многу важно Трамп да се сретне со украинска делегација пред да се види со Путин.

„Доколку Трамп успее да ги доведе Украина и Русија на преговарачка маса, ние планираме да ѝ понудиме на Русија директна размена на територии. Ќе замениме една територија за друга. Сите наши територии се важни, нема приоритет“, рече Зеленски, чии сили веќе шест месеци држат делови од рускиот регион Курск.