Разговорите помеѓу американскиот потпретседател Џеј-Ди Венс и украинскиот лидер Володимир Зеленски во Минхен завршија без договор за ретки минерали, што би можел да биде клучен за Киев за задржување на поддршката од Доналд Трамп. Украина подготви свој нацрт-договор за ископувањата на ретки минерали, нудејќи партнерство од заемна корист, откако во средата ѝ беше претставена американската верзија, за која изрази загриженост.

„Нашите тимови ќе продолжат да работат на документот“, напиша Зеленски на Икс по средбата со Венс.

Двајца членови на украинската делегација кажаа дека уште треба да се работи на некои детали.

Засега е нејасно што било пречка, но Украина притиска да добие силни безбедносни гаранции од САД и Европа за да може да се заштити од Русија во иднина.

Трамп претходно кажа дека сака ретки минерали во вредност од 500 милијарди долари за да продолжи со поддршката за Украина. Зеленски кажа дека Украина има мали шанси за преживување без американската поддршка.

„Веројатно ќе биде многу, многу тешко. Имаме шанса, но таа би била многу мала“, кажа Зеленски во интервју за Ен-Би-Си.

Тој смета дека Путин сака да преговара не за да ја заврши војната, туку за да добие примирје што ќе ѝ овозможи на Русија да бидат тргнати глобалните санкции и да ја прегрупира војската.