Володимир Зеленски му порача на Доналд Трамп дека живее во дезинформациски меур откако тој кажа дека само 4% Украинци го поддржуваат актуелниот украински лидер.

„Никогаш не коментирам рејтинзи на популарност, особено за мене или други лидери, но една последна анкета покажа дека 58% Украинци ми веруваат. Така што, ако некој сака да ме замени моментално, тоа нема да успее“, изјави Зеленски на прес-конференција во Киев.

Петгодишниот мандат на Зеленски истече во мај минатата година. Украинските власти велат дека поради руската агресија и воената состојба во земјата е невозможно да се организираат избори.

Зеленски предупреди дека од Русија доаѓаат многу дезинформации, кои се шират и во САД.

„Со должна почит кон него како лидер на нација која многу ја почитуваме, но претседателот Трамп живее во дезинформациски меур. Тој круг околу него вклучува и функционери од унгарската и словачката влада. Тоа е многу загрижувачки, тие прават сѐ за Украина да изгледа слаба“, кажа Зеленски.

Додаде дека не е праведно што САД ѝ помагаат на Русија да излезе од глобална изолација.

„Тоа не е позитивно за Украина. Русите се среќни зашто разговорите сега се фокусираат на нив. Русија сега почна да се претставува себеси како жртва“.

Тој откри дека го одбил предложениот американски нацрт-план за ретки минерали зашто предвидувал САД да добијат 50% од сопственоста врз украинските резерви на минерали, како литиум и титаниум.

„Во планот не се споменуваат никакви безбедносни гаранции што ги бараме. Јас ја штитам Украина, не можам да ја продадам“, рече Зеленски, додавајќи дека НАТО останува најсилната безбедносна гаранција за Украина.