Советникот за национална безбедност на Белата куќа Мајк Волц кажа дека Украина би требала да намали со критиките на САД, додека се обидуваат да постигнат договор за крај на војната.

„Тоа е неприфатливо. Украина би требала да го смири тонот и да го потпише тој договор“, изјави Волц, кој беше дел од американската делегација на средбата со Русија во Ријад.

Волц алудираше на договорот за украинските ретки минерали, на кој инсистира Доналд Трамп како компензација за поддршката за Украина. Володимир Зеленски одби да го потпише договорот, зашто, како што кажа, не нуди безбедносни гаранции за Украина, туку од него само САД имаат корист.

„Им понудивме на Украинците неверојатна, историска можност. Тоа ќе биде најдобрата и одржлива безбедносна гаранција што можат да ја добијат“, додаде Волц.

Вашингтон значително го промени односот кон Украина по враќањето на Доналд Трамп во Белата куќа, а двајцата претседатели разменија остри зборови вчера, при што Трамп го нарече Володимир Зеленски диктатор кој не сака да распише избори.

Во Киев денеска допатува специјалниот претставник на Трамп за Украина, Кит Келог, но не е познато за што разговарале со Зеленски откако нивната прес-конференција беше откажана без објаснување. Зеленски претходно го покани пензионираниот генерал Келог да го посети фронтот за да се увери во ситуацијата од прва рака.