Украински преговарачи ќе се сретнат со американска делегација во Ријад следната недела, објави Володимир Зеленски на крајот на вонредниот самит на ЕУ во Брисел, на кој беше договорено да се зголеми трошењето за одбраната низ континентот.

„В понеделник ќе ја посетам Саудиска Арабија, при што ќе се сретнам со принцот. Мојот тим потоа ќе остане во Саудиска Арабија за да работи со нашите американски партнери“, напиша Зеленски на социјалните мрежи.

Односите помеѓу Украина и САД беа доста тензични во изминатиот период, што кулминираше на гостувањето на Зеленски во Белата куќа минатиот петок, кога жестоко беше нападнат од Доналд Трамп и Џеј-Ди Венс. Зеленски предвреме ја напушти Белата куќа и не беше потпишан договор за ретки минерали. Трамп неделава ја ублажи реториката откако примил писмо од Зеленски во кое тој изразил посветеност кон постигнување мир.

„Украина ќе работи конструктивно со претседателот Трамп за да се постигне брз и траен мир“, кажа Зеленски.