Доналд Трамп изјави дека утре ќе разговара со Владимир Путин за завршување на војната во Украина, откако американски и руски функционери имале позитивни разговори во Москва минатата недела.

„Сакаме да видиме дали можеме да ја завршиме оваа војна. Можеби можеме, можеби не можеме, но мислам дека имаме добри шанси. Ќе разговарам со Путин во вторник. Многу работа беше завршено викендов“, изјави Трамп.

Тој се обидува да го убеди Путин да го поддржи планот за 30-дневно примирје што Украина го прифати минатата недела. Во меѓувреме, двете страни продолжуваат меѓусебно да се напаѓаат, а Русија се обидува да им зададе завршен удар на украинските сили кои од август држат делови од рускиот регион Курск.

Кремљ во петокот кажа дека Путин му испратил на Трамп порака за неговиот план за примирје преку американскиот специјален претставник Стив Виткоф. Москва притоа изрази претпазлив оптимизам дека би можел да се постигне договор за крај на тригодишната војна.

Запрашан дали САД би прифатиле мировен договор со кој на Русија би ѝ било дозволено да задржи делови од источна Украина, советникот за национална безбедност на Белата куќа Мајк Волц одговори:

„Дали Русија ќе биде истерана од секој сантиметар украинска територија? Преговорите мора да бидат засновани врз реалноста. Мировен договор би вклучил многу напорна работа и отстапки од двете страни“.

Русија, пак, бара челични гаранции дека ниеден мировен договор нема да го земе предвид членството на Украина во НАТО.

„Ќе бараме челични безбедносни гаранции да бидат дел од овој договор. Русија ќе инсистира на тоа дека Украина мора да остане неутрална“, изјави заменик-министерот за надворешни работи на Русија, Александар Грушко, повторувајќи дека Русија се противи на распоредувањето на војски на НАТО во Украина како дел од мировни сили.