Шведска, Норвешка и Холандија обезбедиле милиони долари што САД требало да ги потрошат во земјите со ниски приходи, но сѐ беше запрено по доаѓањето на администрацијата на Трамп и Илон Маск. Владини претставници од овие три држави изјавија за „Асошиејтед прес“ дека тие придонеле со вкупно 15 милиони долари за заеднички развоен проект во странство, но парите со месеци се блокирани во Американската агенција за меѓународен развој (УСАИД).
Откако републиканската администрација и Одделот за владина ефикасност на Маск практички ја растурија УСАИД и укинаа најголемиот дел од нејзините програми, Европејците прашале дали нивните пари ќе бидат искористени за планираните проекти или ќе им бидат вратени. Не добиле одговор.
„Загрижени сме, сакаме нашите партнерски организации да бидат компензирани за работата што ја вложиле во програмите“, рече Јулија Линдхолм, портпаролка на Агенцијата за меѓународен развој на шведската влада.
Вистинската сума би можела да биде и поголема. И други држави вложиле пари во УСАИД за заеднички развојни проекти во времето кога Трамп нареди замрзнување на средствата на 20 јануари, кажа добро упатен функционер. Стејт департментот и УСАИД не одговориле веднаш на прашањата колку странски влади имаат дадено пари за заеднички развојни програми кои не се потрошени и не се враќаат, колку пари се вкупно и дали владата на Трамп прави нешто во врска со тоа.
Шведска, Норвешка и Холандија соработуваа со УСАИД на проектот „Вода и енергија за храна“, кој им помага на земјоделците и други во посиромашните земји да развијат иновативни начини за одгледување повеќе храна. Тие првично испратиле е-пошта до УСАИД, прашувајќи за парите што ги ставиле на нејзините сметки. Фрустрирани што не добиле одговор, две од нив најавиле дека ќе разговараат со локалните медиуми за нивните исчезнати пари.
Шведската агенција за развој процени дека има околу 12 милиони долари на сметките на УСАИД кои не се потрошени или вратени. Норвешката агенција за развојна соработка кажа дека не добила никаква повратна информација за судбината на своите 1,4 милиони долари, а холандското министерство за надворешни работи кажа дека побарало одговор колку пари се потрошени од неодамна вложените 1,6 милиони долари.
