Претседателката Гордана Сиљановска-Давкова денеска се сретна со децата кои победија на натпреварот во лего коцки. Како што соопштија од нејзиниот Кабинет, Сиљановска-Давкова им честитала на маестралната победа и директниот пласман на Светското првенство во САД.

„Кога нешто се работи со љубов, кога е плод на знаење, ум, труд и посветеност, а особено на тимска работа и заемна почит, успехот е неизбежен. Вие сте идните научници, математичари и инженери, вие сте носители на прогресот, весници на иднината“, рече претседателката.

Победничкиот тим „The NOOBS“ (New Original Operational Best Students) го сочинуваа: Петар Копачев, Синиша Шиповиќ, Бодан Николов, Тео Ваљак Трпчевски, Ноа Петковски, Бисера Стојановска, Ален Атанасов, Иван Скалов и Ведран Анастасовски. Во нивна придружба беа Васка Мадиќ и Гордан Анастасов како претставници на Академијата за роботика и иновации.

На средбата со Сиљановска-Давкова децата го презентираа нивното иновативно победничко решение, мултифункционален робот, кој надграден може да извршува важни мисии, односно да ги чисти океаните или да ги храни китовите. Тие ја информираа дека изработиле и подморница од титаниум со посебни акрилни светла за истражување на океаните.

Победничкиот тим ќе учествува на Светското првенство во лего коцки кое ќе се одржи од 24 до 28 јуни во САД.