Првата група од 49 бели Јужноафриканци на кои САД ќе им додели статус на бегалци треба да пристигне наскоро, откако вчера замина од Јоханесбург. Односите меѓу Јужна Африка и САД се напнати со месеци, откако претседателот Доналд Трамп рече дека припадниците на белото малцинство Африканери во земјата биле жртви на „расна дискриминација“.

Африканeри се јужноафриканска етничка група која потекнува од претежно холандски доселеници кои првпат пристигнале на ‘Ртот Добра Надеж во 1652 година. До 1994 година, тие доминираа во политиката на Јужна Африка, како и во комерцијалниот земјоделски сектор во земјата.

Ова беше отфрлено од министерот за надворешни работи на Јужна Африка, Роналд Ламола, кој денеска рече дека „нема прогонство на белите Африканер јужноафриканци“, додавајќи дека полициските извештаи го негираат тврдењето на претседателот Трамп.

Јужна Африка вели дека какви било наводи за прогон нема да го исполнат прагот „потребен според домашното и меѓународното право за бегалци“. Агенцијата за бегалци на Обединетите нации, УНХЦР, потврди дека не била вклучена во оваа шема за преселување, ниту пак била побарана да учествува во некој од скринингот.

САД ја критикуваа домашната јужноафриканска политика, обвинувајќи ја владата дека одзема земјиште од белите фармери без никаков надомест – нешто што јужноафриканската власт вели дека не се случило.

Претседателот Трамп го истакна и она што го нарече „убиство на фармери од големи размери“ во Јужна Африка. Еден од неговите најблиски советници Илон Маск, роден во Јужна Африка, претходно изјави дека имало „геноцид врз белите луѓе“ во Јужна Африка и ја обвини владата за донесување „расистички закони за сопственост“. Тврдењата за геноцид врз белите луѓе беа целосно побиени.

Податоците на јужноафриканската полиција покажуваат дека во 2024 биле регистрирани 44 убиства на фарми и помали парцели земјоделско земјиште, при што осум од убиените биле земјоделци. Јужна Африка не ја води статистиката на криминалот поделена по раса, но мнозинството од земјоделците во земјата се белци, додека другите луѓе кои живеат на фарми, како што се работниците, се главно црнци.

Писателот на африканерски јазик, Макс ду През, рече дека тврдењата за прогон на белите Јужноафриканци се „тотален апсурд“ и „засновани на ништо“. Тој додаде дека Јужноафриканците се „запрепастени“ од шемата за преселување и дека таа има повеќе врска со „внатрешната политика“ во САД отколку со Јужна Африка.

Билатералните тензии меѓу САД и Јужна Африка се затегнати извесно време бидејќи претседателот Трамп ја задолжи својата администрација да формулира планови за потенцијално преселување на Африканерите во САД.