Најмалку три лица загинаа, а 21 се повредени во голем руски напад со дронови и проектили што го погоди источниот украински град Харкив во саботата, соопштија локалните украински власти.

Градоначалникот на Харкив, Ихор Терехов, изјави дека ова е најсилниот напад врз вториот по големина град во Украина од почетокот на војната.

„Харкив во моментов го доживува најмоќниот напад од почетокот на целосната војна“, објави Терехов на Телеграм во саботата наутро.

Тој додаде дека во текот на ноќта во градот се слушнале десетици експлозии и дека руските сили напаѓале истовремено со проектили, дронови и наведувани воздушни бомби.

Според првичните податоци, Русија во нападот употребила 48 дронови „Шахед“, два проектили и четири воздушни бомби.

Во нападот биле оштетени 18 станбени згради, 13 приватни куќи, како и образовни и инфраструктурни објекти, рече градоначалникот.