Полицијата утринава по налог на Основното јавно обвинителство за гонење на организиран криминал и корупција (ОЈО ГОКК) го приведе струмичкиот бизнисмен Ристо Крмзов. Заедно со него, обезбедени се уште две други лица во рамки на истрага за злоупотреби и затајување данок, каде штетата се проценува на околу 15 милиони евра.

Од Обвинителството потврдија дека акцијата е резултат на предистражна постапка отворена за Крмзов уште во септември минатата година.

„Под раководство на јавен обвинител од Основното јавно обвинителство за гонење на организиран криминал и корупција, полициски службеници реализираа акција во која е обезбедено лице за кое во септември минатата година беше отворена предистражна постапка. Освен ова лице обезбедени се уште две други лица“, соопштија од ОЈО ГОКК.

И од Министерството за внатрешни работи го потврдија апсењето, наведувајќи дека лицето Р.К. е лишено од слобода по насоки од надлежен јавен обвинител. Повеќе детали за кривичните дела и дејствијата, Обвинителството најави дека ќе соопшти на брифинг закажан за утре.

Претходно, во септември 2023, беше спроведена голема акција за даночно затајување во фирми во Струмица, Скопје и Гостивар, при што беа приведени четири лица. Државниот јавен обвинител тогаш кажа дека е оформен предмет за даночна измама и перење пари.