Од 1 септември во прво одделение во седумте велешки основни училишта, треба да бидат запишани 556 првачиња. Ова е податокот кој СВР Велес го има за бројот на првоодделенци. Тоа е за 101 прваче помалку од лани.

На училиште оваа година тргнуваат децата родени во 2019, а таа година се родиле во велешко 600 бебиња. Пет години подоцна, досега, родени се педесетина деца помалку.

И оваа бројка од 556 првоодделенци од Велешко не е конечна, бидејќи до почетокот на учебната 2025/26 година, до 1 септември има два и пол месеца и толку период и можност, бројката дополнително да опадне. Од годинава посебно ќе се почитува реонизацијата. Нема да се дозволи префрлање на ученици од цел град, кон две училишта, за каде имаше најголем интерес за упис, во ОУ „Блаже Конески“ или ОУ „Св. Кирил и Методиј“. Изминатите години тоа беше редовна појава и трка на родителите, по место за нивните деца во овие две школи.

„Училиштето е должно да ги прифати сите ученици кои припаѓаат таму по адреса на живеење. Има одредени слуачи кога во соодветниот реон ученикот не може да следи настава на мајчин јазик, или доколку постои документација со која што ќе се утврди потреба од здравствено или психосицијално образование. Но, и треба да има слободно место во тоа училиште. Со ова се очекува да се намали навалицата на родителите нивните деца да учат во одредени училишта“, кажа Верица Тодоровска-Дацева, раководителка на сектор во Општина Велес.

• ДОСЕГА ЗАПИШАНИ 548 ПРВАЧИЊА ВО БИТОЛА, 219 ПОМАЛКУ ОД ЛАНИ, ОПШТИНАТА ВЕЛИ ДЕКА БРОЈКАТА НЕ Е КОНЕЧНА И ЌЕ РАСТЕ
• СТО ПРВАЧИЊА ПОМАЛКУ ОД ЛАНИ СЕ ПРИЈАВЕНИ ЗА УЧЕБНАТА 2025/2026 ГОДИНА ВО ШТИП

Уписот на идните првачиња започна од 2 мај и требаше да трае до 30 мај. Но, родителите од различни причини тактизираат, не одат на задолжителен систематски преглед, не сакаат детето да се вакцинира со задолжителна МРП вакцина, доцнат со прегледот кај стоматолог, што е евидентно на децата од руралните средини, па докторите од овие две служби најавуваат дека ќе работат со децата за упис во прво одделение до средината на август.

Во центарот на регионот на Азот, училиштето во Богомила, населено место кое до 2005  беше општина, годинава училиштето нема да прими првоодделенец, нема дете на оваа возраст.

Миинистерката за образование и наука Весна Јаневска на 11 јуни рече дека минатата година недостасуваа 17 илјади ученици и студенти кои се иселени во последните 7 години.

Лани во септември, Центарот за граѓански комуникации (ЦГК) објави анализа за намалување на бројот на ученици во основното и во средното образование. За една декада, бројот на ученици е помал за 27.000, според податоците на анализата на невладината организација.

П. ПЕЧКОВ