Жена е уапсена во Нов Зеланд откако двегодишно девојче било пронајдено во нејзиниот куфер додека патувала со автобус. Полицијата соопшти дека била повикана на автобуска станица во Каивака, мал град на северот од земјата, откако еден патник побарал пристап до багажниот простор.

„Возачот се загрижил кога забележал дека куферот се движи. Кога возачот го отворил куферот, го открил двегодишното девојче“, се вели во соопштението на полицијата на Нов Зеланд.

Жената (27) е уапсена и обвинета за малтретирање и занемарување на дете.

„Малото девојче било многу топло, но изгледало физички неповредено. Однесена е во болница, каде што е подложена на лекарска проценка“, соопшти полицијата.

Односот помеѓу жената и детето не е откриен.

„Би сакале да го пофалиме возачот на автобусот, кој забележал дека нешто не е во ред и презел итни мерки, спречувајќи можеби многу полош исход“, додаде полицијата.