Европските сојузници испратија заедничка порака дека какви било мировни преговори со Русија мора да го вклучат и Киев, во услови на најави за средба меѓу американскиот претседател Доналд Трамп и неговиот руски колега Владимир Путин.

Во заедничката изјава, лидерите на Велика Британија, Франција, Италија, Германија, Полска, Финска и Европската комисија инсистираат дека Украина мора да биде дел од секој договор. Ова доаѓа пред средбата меѓу Трамп и Путин закажана за во петок во Алјаска.

Претставник на Белата куќа изјави дека Трамп е подготвен да одржи трилатерална средба на која би присуствувал и украинскиот претседател Володимир Зеленски, но засега останува на форматот Трамп-Путин, како што првично побарал рускиот лидер.

Зеленски одговори дека секој договор постигнат без учество на Киев ќе претставува „мртва одлука“.

Трамп претходно навести дека може да дојде до „размена на територии“ за да се постигне договор меѓу Москва и Киев, на што Зеленски остро реагираше.

„Нема да ја наградиме Русија за она што го направи. Секоја одлука против нас, секоја одлука донесена без Украина, е одлука против мирот“, напиша Зеленски на Телеграм.

Американската телевизија „Си-Би-Ес“ објави дека Белата куќа се обидува да ги убеди европските сојузници да прифатат договор според кој Русија би го добила целиот регион Донбас во источна Украина и би го задржала полуостровот Крим.

Во нивната заедничка изјава, европските лидери нагласија дека „меѓународните граници не смеат да се менуваат со сила“.

„Украина има слобода да одлучува за сопствената судбина“, се вели во изјавата, со уверување дека ќе продолжат да ја поддржуваат Украина дипломатски, воено и финансиски.