Истражителите открија фиктивни компании во Италија, Франција и Германија и запленија имот од милиони евра на Азурниот Брег во акција против перење пари од страна на италијанската мафија. Заедничката истрага на агенции од Рим, Марсеј и Минхен со помош на Европол беше насочена против група што ѝ припаѓа на Камора, објави канцеларијата на јавниот обвинител во Марсеј.

Бандата префрлала пари на банкарски сметки во Италија, Франција, Германија и Тунис преку фиктивните компании, претставувајќи дека има легитимен приход од градежништво, трговија со автомобили и производство на алуминиум. Парите што потекнуваат од криминални активности наводно биле инвестирани во недвижности на јужниот француски брег преку компании регистрирани во Франција.

На Азурниот Брег се запленети куќа, четири стана и 11 паркинг места во вредност од над 2,5 милиони евра. Едно лице е уапсено во јужна Франција.

Истражителите не ја кажаа точната сума на пари што криминалците ги переле на овој начин.

Камора е една од главните мафијашки организации во Италија, активна и на меѓународно ниво. Поделена е на многу кланови, од кои некои се борат едни против други. Нејзините активности се движат од трговија со дрога и изнуда до нелегално управување со отпад.