Три месеци е затворена улицата Мариовска односно патот кон Теферич во скопската Општина Кисела Вода. Улицата е со прокопи и пропаднат и испукан асфалт поради што се случија неколку сообраќајни несреќи, по што беше затворена за сообраќај. Во меѓувреме, како што велат граѓани кои секојдневно го користат овој пат и живеат во Сопиште, Горно и Долно Соње, ништо не се прави да се санира и повторно да биде пуштен во употреба.

„Станува збор за 70 метри асфалт кој треба да се санира за да може целата населба, а со тоа и околните населби, нормално да функционираат во еден главен град. Ова е клучна делница за голем број население затоа што опслужува голем број возила кои редовно циркулираат одовде. Во шпиц часовите од денот, а особено во тек на школска година, бројот на возила е значително зголемен“, вели граѓанин кој испрати фотографии до нашата редакција за состојбата на улицата и проблемот кој не се решава со месеци.

Жителите велат со тоа што овој пат е затворен беспотребното се оптоварува сообраќајот низ Припор и мора оттаму да кружат за да стигнат до домовите.

Од Општина Кисела Вода на 31 мај испратија соопштение до медиумите дека патот е затворен поради свлечиште.

„Поради новонастанатата ситуација на патот кон Теферич (улица Мариовска), кој тоне и на дел од конструкцијата се појавени пукнатини, тој е затворен за сообраќај од безбедносни причини. Ќе биде затворен до отстранување на проблемот. Ги замолуваме граѓаните за трпение и за користење алтернативни патишта, сè до изнаоѓање на решение за надминување на оваа ситуација“, соопшти пред три месеци од Општина Кисела Вода.

САКАМДАКАЖАМ.МК испрати прашања до Општина Кисела Вода на 5 август, зошто уште не се санира патот и дали е во план да се реновира и да се пушти во употреба. Но, одговор не добивме до објавување на текстот.

А. АНТЕВСКА