Агенцијата за национална безбедност (АНБ) под водство на директорот Бојан Христовски, доставила три известувања до Јавното обвинителство за еден од своите поранешни директори, како и група вработени, зашто од 2019 до 2024 година, следеле опозиционен лидер и неколку медиуми.

Извори од АНБ велат дека незаконски бил следен и обвинител, министер од претходната влада, како и неколку новинари.

Внатрешната истрага во АНБ по смената на власта и по доаѓањето на новиот директор Бојан Христовски утврдила дека од 2019 до 2024 биле оформени предмети за оперативни обработки на група новинари и медиуми чија цел била уривање на власта. Цели на обработка биле и контактите на медиумите од тогашната опозиција.

Цел на друга обработка биле јавен обвинител и министер во тогашната влада. Биле затекнати и  намерни одолговлекување на безбедносни проверки, на пример, за еден пратеник на тогашната опозиција, во постапка за добивање безбедносен сертификат. Незаконски биле користени материјално-техничките ресурси на Агенцијата, а незаконски се спроведувало и следење на комуникациите.

Во спорниот период со Агенцијата раководеа Виктор Димовски и Заре Милошевски.