Русија ќе воведе делумна забрана за извоз на дизел до крајот на годината и ќе ја продолжи постојната забрана за извоз на бензин, изјави вицепремиерот Александар Новак откако зачестија украинските напади со дронови врз руските рафинерии.

Нападите го намалија производството на руските рафинерии за речиси една петина во одредени денови и го намалија извозот од клучните пристаништа. Падот на капацитетот за рафинирање нафта ја доближи Москва до намалување на производството на сурова нафта. Неколку руски региони се соочуваат со недостиг на одредени видови гориво.

Новак потврди дека има мал дефицит на нафтени производи, но се користат залихи за негово покривање.
Забраната за дизелот се однесува на препродавачите, не и на производителите. Извори од индустријата изјавија за „Ројтерс“ дека количините на дизел што ги извезуваат руските трговци се релативно мали. Околу три четвртини од дизелот се испорачуваат преку Северниот и Јужниот цевковод, кои водат до пристаништата на Балтичкото и Црното Море.

Според извори од индустријата, Русија произвела речиси 86 милиони метрички тони дизел во 2024, извезувајќи околу 31 милион тони. Русија и САД се водечките светски извозници на дизел преку морски патишта.

Недостатокот на гориво се зголемува низ цела Русија. Весникот „Известија“ оваа недела објави дека „Лукоил“ забранил продажба на бензин во канистри на одредени бензински пумпи во Москва. Шефот на окупираниот Крим, Сергеј Аксјонов, изјави дека прекините во снабдувањето со гориво се поврзани со затворањето на некои рафинерии за нафта.