По повод Денот на народното востание, денеска во Собранието беше врачена државната награда „11 Октомври“, која претставува највисоко признание за животно дело во областа на науката, уметноста, стопанството и други дејности од јавен интерес.

Годинашни лауреати во областа на културата и уметноста се актерката Теута Ајдини-Јегени, хорската диригентка, професорката Летка Димовска-Полизова и продуцентот и промотор на македонската уметност, Иво Јанкоски.

Во областа на науката и образованието, наградата им беше доделена на машинскиот инженер, професор доктор Константин Димитров и на хемичарот, академик Глигор Јовановски.

Наградите ги врачи претседателот на Одборот за доделување на наградата, деканот на Медицинскиот факултет во Скопје, проф. д-р Светозар Антовиќ. Тој кажа дека оваа награда не е само признание, туку и обврска.

„Обврска да се продолжи патот на нашите претци – преку наука, култура, уметност, образование и општествена одговорност. Лауреатите на оваа награда се живи сведоци дека револуционерниот дух не згаснува, туку се преобразува во идеи, дела и вредности што се влог во нашата иднина“, рече Антовиќ.