Доналд Трамп изјави дека САД засега не разгледуваат договор со кој проектили со долг дострел „томахавк“ би биле испратени во Украина. Тој кажа дека не размислува за нивна продажба на членки на НАТО, кои потоа би ги префрлиле во Украина, зашто не сака да ја ескалира војната.

„Засега не размислувам за тоа. Сепак, би можел да се премислам“, кажа Трамп.

Тој разговараше за ова со шефот на НАТО, Марк Руте, кога се сретнаа во Белата куќа на 22 октомври. Руте кажа дека планот се анализира, но конечната одлука ќе ја донесат САД.

Проектилите „томахавк“ имаат дострел од 2.500 километри и Украина со нив би можела да ја гаѓа и Москва. Володимир Зеленски долго време ги бара, додека Кремљ предупреди дека нивно испраќање би значело ескалација и би можело да ги наруши американско-руските односи.