Чешка ќе добие десничарска влада откако веројатниот иден премиер Андреј Бабиш склучи коалициски договор со две партии од овој политички спектар. Коалицијата на движењето АНО на популистот Бабиш, крајнодесничарската Слобода и директна демократија (СПД) и десничарската Партија на возачите ќе држи 108 од 200 места во долниот дом на парламентот. Од нив, АНО има 80 пратеници.

Победата на милијардерот Бабиш на последните избори во Чешка предизвика загриженост во Брисел поради неговото можно влијание врз политиките на ЕУ. Бабиш и неговото движење се оценуваат како најмалку радикални во идната влада, која би можела да ја намали поддршката на Чешка за мигрантските и климатските политики. Партијата на возачите има антиклиматски ставови, додека СПД е против ЕУ и НАТО.

Лидерот на Партијата на возачите, Петр Мацинка, кој се најавува како нов министер за животна средина, смета дека човечки предизвиканите климатски промени се чиста пропаганда, а веројатниот иден министер за надворешни работи Филип Турек, кој доаѓа од СПД, беше вмешан во скандал поради негови стари расистички, сексистички и хомофобични коментари на Фејсбук.

Бабиш, кој беше премиер од 2017 до 2021, најави дека ќе прекине секаква помош за Украина.