Светскиот рекордер во длабочинско нуркање, Египќанецот Ахмед Габр, првпат престојуваше во Македонија. Во изминатите два дена тој беше во Охрид, каде што се сретна со нуркачите од нуркачкиот центар „Амфора“, ги разгледа можностите за експедиции и се запозна со природните убавини на Охридското Езеро. Престојот на Габр предизвика голем интерес, особено меѓу нуркачите и љубителите на екстремните спортови, бидејќи станува збор за еден од најпочитуваните и најискусни нуркачи во светот.

Габр одблиску се запозна со работата на центарот, инфраструктурата и условите што ги нуди Охридското Езеро за врвни нуркачки активности. Посетата беше искористена и за размена на искуства и за разговори за потенцијални идни тренинг-програми и можни меѓународни проекти.

Иницијативата за оваа посета е на охриѓанката Симона Трповска, која е македонска и балканска рекордерка во длабинско нуркање за жени (Фото: СДК.МК)

Со охридските колеги ги сподели своите искуства од подвигот во Дахаб на Црвеното Море, каде постави двоен светски рекорд во 2014 година, спуштајќи се до длабочина од 332,35 метри.

„За ваков подвиг потребна е целосна комбинација: психичка, физичка и техничка подготвеност. Мене ми беа потребни шест години. Првата година се обидував да си одговорам на прашањето: ‘Дали навистина можам да го направам ова или само мислам дека можам?’ Следните пет години ги посветив на ментална подготовка преку различни техники и медитации, а паралелно ми беа потребни четири години за технички да се подготвам“, рече Габр.

Подготовките, како што рече, вклучуваат планирање на нуркањето, проверка и подготовка на гасови, детална проверка на целата опрема, процена на психо-физичката состојба и проверка на надворешните услови, како температура и струење. Клучна е и логистичката поддршка. Визуелизацијата на секое нуркање е исто така многу важен дел, а простор за грешка на големи длабочини нема.

„Нуркањето на големи длабочини секогаш носи ризици. Затоа секој обид мора да биде детално испланиран, со повеќекратни безбедносни проверки, за да се елиминираат потенцијални проблеми. На такви длабочини нема простор за грешка, секоја погрешна проценка може да биде фатална. Бидејќи не можеш брзо да излезеш на површина, мораш да бидеш максимално присутен, фокусиран и подготвен да реагираш во различни ситуации“, вели светскиот рекордер во нуркање.

Габр нурка од 18-годишна возраст (Фото: СДК.МК)

За него, нуркањето е интегрален дел од неговиот живот, место каде што наоѓа мир, се поврзува со себеси и ја враќа внатрешната рамнотежа.

Тој кажа дека е импресиониран од Охрид и планира да се врати и да нурка во длабочините на најстарото езеро во Европа.

„Првпат сум во Македонија и тоа што го видов овде е навистина импресивно. Планот ми е да дојдам повторно и да направам подвиг во длабинско нуркање во Охридското Езеро. Вашата земја е многу убава. Изненаден сум од убавините на Охрид и кањонот Матка. Охрид навистина има посебна енергија“, рече Габр.

Тој исто така е воодушевен од македонската храна.

„Навистина уживав во локалните вкусови. Најмногу ми се допаднаа домашното сирење, ајварот и бурекот со кисело млеко“, кажа Габр.

Иницијативата за оваа посета е на охриѓанката Симона Трповска, која со длабочината од 117 метри е македонска и балканска рекордерка во длабинско нуркање за жени, а за ваквиот подвиг е заслужен токму Габр.

„Симона ме контактираше по мејл со желба да започне техничко нуркање, па направивме онлајн средба. По разговорот, проценив дека можам да работам со неа. Тренинзите беа комбинација од забавни моменти и предизвици. Нејзините упорност и континуитет беа пресудни. Се сеќавам дека при нејзиниот прв обид за 100 метри имаше силно струење кое нè туркаше надолу, па застанавме на 89 метри. Едноставно, беше ризично да продолжиме понатака. Но, Симона не се обесхрабри, напротив, тоа искуство ја направи посилна и ја донесе до првиот рекорд од 102 метри“, раскажа Габр.

Габр во Охрид се сретна со членовите на нуркачкиот центар „Амфора“ (Фото: СДК.МК)

Габр е 42-годишен поранешен офицер во египетската армија, кој својата кариера ја продолжил во американската армија, каде што го завршил курсот за борбени нуркачи и станал единствен сертифициран американски борбен нуркач на Блиски Исток. Ја започнал својата кариера како нуркач на 18-годишна возраст, нуркајќи од задоволство, а подоцна завршил обука за инструктор по нуркање.

„Нуркам од 1997 година. Длабочините дојдоа природно, едноставно, со тек на времето се разви мојата желба да го истражувам она што се крие под површината. На секое нуркање учиш нешто ново и ги усовршуваш вештините додека не преминат во мускулна меморија. Континуитетот е клучен за успех“, вели тој.

Габр често учествува во интернационални проекти, едукативни настани и специјализирани обуки, со што значително придонесува за развојот на подводните спортови на глобално ниво.

С. ВРЕНЦОВСКА