Илјадници демонстранти се собраа вчера во западниот германски град Гисен, каде што крајнодесничарската партија Алтернатива за Германија (АфД) ја формираше својата нова младинска организација. Конвенцијата на партијата започна со двочасовно одложување откако демонстрантите блокираа патишта во и околу градот со 93.000 жители, поради што некои делегати доцнеле.

Демонстрантите на едно место се судрија со полицијата, која употреби солзавец и водени топови за да ја расчисти блокадата. Полицијата, која распореди 5.000 припадници, кажа дека во градот имало околу 25.000 демонстранти и дека протестите главно биле мирни.

„Она што се случи надвор е крајно недемократски“, кажа лидерката на АфД, Алис Вајдел, додавајќи дека еден пратеник на партијата бил нападнат.

Претходникот на новата младинска организација, Млада алтернатива, која во голема мера беше автономна група со релативно лабави врски со партијата, беше распуштена кон крајот на март откако АфД одлучи формално да ги прекине врските со неа. АфД сака да има многу поблизок надзор врз новата група наречена Генерација Германија и ја отвори за сите членови на партијата под 36 години. Нејзиниот статут беше одобрен вчера.

АфД заврши втора на националните избори во Германија во февруари со над 20% гласови и сега е најголемата опозициска партија. Иако главните партии одбиваат да соработуваат со неа, рејтингот на АфД продолжи да расте во анкетите.

Германската разузнавачка агенција заклучи дека Младата алтернатива е докажано десничарска екстремистичка група и ја класифицираше и самата АфД како таква, но потоа ја суспендираше ознаката.

Пет од 16-те германски покраини одржуваат регионални избори следната година, а две се на поранешниот комунистички исток, каде што што партијата е најсилна.

„Ќе добиеме мнозинство мандати, ќе го обезбедиме нашиот прв гувернер“, рече Вајдел.