Илјадници луѓе денеска се придружија на протестните маршеви во Хрватска против подемот на крајната десница по низата инциденти, што поттикнаа етнички и политички тензии во членката на Европската Унија.

Собирите наречени „Обединети против фашизмот“ се организираа во Загреб, Риека, Пула и Задар. Толпата скандираше „Сите сме антифашисти!“, ветувајќи дека ќе се спротивстават на она што го опишаа како обид на десничарските групи да шират страв и да ги замолчат противниците. Демонстрантите, исто така, побараа од властите да ги ограничат екстремните десничарски групи и нивната честа употреба на профашистички симболи.

„Сè што се случува околу нас е многу опасно. Покажавте дека нема да бидете тивки, туку дека ќе се бориме за демократско општество“, им рече новинарката Маја Север на учесниците на собирот во Загреб.

Екстремистичките инциденти во ноември беа насочени кон културни настани на етничките Срби во Загреб и Сплит, кога млади мажи во црно извикуваа профашистички и националистички слогани и се закануваа со поголеми инциденти.

„Имаме групи кои фрлаат димни бомби и пиротехника и се закануваат со насилство, кревајќи ја десната рака во воздух и извикувајќи ‘За татковината – спремни‘. Тие го прават ова слободно“, изјави Ива Даворија, организаторка на маршот во Задар.