Француско-германската група за вооружување „КНДС“ добила 350 нарачки од пет земји за најновата верзија на борбениот тенк „леопард 2“, изјави нејзиниот портпарол. Германија, Холандија, Норвешка, Литванија и Чешка ја нарачале најновата надградба на тенкот, што првпат се појави во 1979 година.

Германската војска нарачала 123 тенкови, за што владата очекува да потроши повеќе од 3,4 милијарди евра и министерот за одбрана Борис Писториус кажа дека планира да побара одобрение за уште 75.

Новата варијанта „А8“ е опремена со систем за заштита од израелскиот производител „Рафаел“, дизајниран да пресретнува проектили и беспилотни летала пред удар.

„КНДС“ не ги откри деталите од договорите, но сегашните нарачки веќе изнесуваат неколку милијарди евра и ќе го одржат производството со години. Еден тенк „леопард 2“ чини десетици милиони евра, со дополнителни трошоци за одржување и сервисирање.