Рускиот претседател Владимир Путин им рекол на некои од водечките руски бизнисмени дека можеби е отворен за размена на дел од територијата контролирана од руските сили во Украина, но дека го сака целиот Донбас, објави весникот „Комерсант“. Андреј Колесников, дописник од Кремљ за „Комерсант“, еден од водечките руски весници, рече дека Путин ги информирал водечките бизнисмени за деталите од планот на состанокот во Кремљ доцна во ноќта на 24 декември.
„Владимир Путин потврди дека руската страна е сè уште подготвена да ги направи отстапките што ги направи во Анкориџ. Со други зборови, дека ‘Донбас е наш’“, објави „Комерсант“. Во суштина, Путин го сака целиот Донбас, но надвор од таа област „не е исклучена делумна размена на територии од руска страна“, напиша Колесников во весникот.
Украинскиот претседател Володимир Зеленски, завчера во изјава за новинарите објавена од неговиот кабинет, рече дека делегациите на Украина и САД се приближиле кон финализирање на план од 20 точки на разговорите за време на викендот во Мајами. Но, Зеленски рече дека Украина и САД не нашле заедничка основа за барањата Украина да ги отстапи деловите од Донбас што сè уште ги контролира – или за иднината на нуклеарната централа Запорожје, која е контролирана од руските сили.
Зеленски денеска изјави дека средба со американскиот претседател Доналд Трамп ќе се случи „во блиска иднина“, сигнализирајќи напредок во разговорите за ставање крај на речиси четиригодишната војна меѓу Русија и Украина.
„Не губиме ниту еден ден. Се договоривме за средба на највисоко ниво – со претседателот Трамп во блиска иднина“, напиша Зеленски на Икс. „Многу работи може да се одлучат пред Нова година“, додаде тој.
Најавата на Зеленски следи откако вчера изјави дека имал „добар разговор“ со специјалниот претставник на САД, Стив Виткоф, и зетот на Трамп, Џаред Кушнер.
Американскиот претседател Доналд Трамп постојано ветуваше дека ќе го заврши најсмртоносниот конфликт во Европа од Втората светска војна, а неговиот претставник Виткоф и зетот Кушнер преговараат со Русија, Украина и европските сили. Целосните детали за предлозите на САД не се откриени, иако руските претставници постојано се повикуваа на неодредени „разбирања“ постигнати меѓу Путин и Трамп на самитот во Анкориџ, Алјаска, во август годинава.
