Државниот инспекторат за животна средина (ДИЖС) до 20 декември 2025 година реализирал вкупно 1.700 инспекциски надзори за амбиентален воздух, при што се покренати четири кривични и над 30 прекршочни постапки, соопшти денеска директорката на Инспекторатот, Ивана Гиновска.

Од вкупниот број контроли, 839 биле редовни, 532 вонредни и 329 контролни надзори. Инспекторите утврдиле 398 неправилности и за сите нив се издадени соодветни решенија во инспекциската постапка.

На прес-конференција во Владата, Гиновска информираше дека во периодот од 1 ноември до денеска се спроведени над 55 надзори низ целата држава, со фокус на инсталациите кои влијаат врз квалитетот на воздухот преку емисии на гасови. Таа кажа дека се издадени 20 решенија за отстранување на дефекти и се изречени три забрани за работа.

Во однос на работата на цементарницата „Усје“, директорката кажа дека во текот на 2025 година биле извршени шест надзори (два редовни и четири вонредни) од различни инспектори.

„Согласно утврдени ризици при планирањето на пример во моментов со актуелната состојба со правен субјект ТИТАН Цементарница УСЈЕ ве известувам, дека во текот на 2025 година се извршени 6 надзори кај овој правен субјект од кои 2 редовни и 4 вонредни инспекциски надзори од различни државни инспектори (последните вонредни беа реализирани во текот на ноември со инспектор за животна средина од Градот Скопје 18.11.2025 во 22:00 дo 00:30 и во декември на 18.12.2025 со инспектор за животна средина од Општината Кисела Вода), при што кај сите надзори не се утврдени неправилности во работењето кај овој правен субјект.“, изјави Гиновска.

На територијата на државата моментно се активни 120 правни субјекти со А-интегрирана дозвола, од кои околу 40 се наоѓаат во Скопје. Инспекторатот на секои 15 дена доставува извештај до работната група во Министерството за животна средина која го следи спроведувањето на Акцискиот план.